Saturday , September 22 2018
ಕೇಳ್ರಪ್ಪೋ ಕೇಳಿ
Home / Interval / ಮಂಜು ವಾರಿಯರ್​​ ದಿಲೀಪ್ ಮೊದಲ ಪತ್ನಿ ಅಲ್ಲ…! : ಪೊಲೀಸರು ಬಿಚ್ಚಿಟ್ಟರು ಸ್ಫೋಟಕ ಮಾಹಿತಿ

ಮಂಜು ವಾರಿಯರ್​​ ದಿಲೀಪ್ ಮೊದಲ ಪತ್ನಿ ಅಲ್ಲ…! : ಪೊಲೀಸರು ಬಿಚ್ಚಿಟ್ಟರು ಸ್ಫೋಟಕ ಮಾಹಿತಿ

ಮಲಯಾಳಂನ ಖ್ಯಾತ ನಟ ದಿಲೀಪ್​ಗೆ ಈಗ ಸಂಕಷ್ಟದ ಕಾಲ… ತಾನೇ ತೋಡಿಕೊಂಡಿದ್ದ ಗುಂಡಿಗೆ ಬಿದ್ದು ಒದ್ದಾಡುತ್ತಿರುವ ದಿಲೀಪ್​ಗೆ ಕಷ್ಟಗಳು ಒಂದರ ಮೇಲೊಂದರಂತೆ ಕಾಡುತ್ತಲೇ ಇದೆ… ಈಗಾಗಲೇ ಬಹುಭಾಷಾ ನಟಿಗೆ ಲೈಂಗಿಕ ದೌರ್ಜನ್ಯ ನೀಡಿದ ಕೇಸ್​ನಲ್ಲಿ ಷಡ್ಯಂತ್ರ ರೂಪಿಸಿದ್ದ ಆರೋಪದಲ್ಲಿ ದಿಲೀಪ್​ ಜೈಲು ಸೇರಿ ಆಗಿದೆ… ಇನ್ನು, ಬಹುಭಾಷಾ ನಟ ಕಲಾಭವನ್ ಮಣಿ ಸಾವಿನ ಹಿಂದೆಯೂ ದಿಲೀಪ್​ ಕೈವಾಡ ಇದೆ ಎಂಬ ಮಾತುಗಳೂ ಬಲವಾಗಿ ಕೇಳಿ ಬರುತ್ತಲೇ ಇತ್ತು… ಈ ನಡುವೆ, ದಿಲೀಪ್​ ವೈವಾಹಿಕ ಜೀವನದ ಬಗ್ಗೆಯೂ ಹಲವಾರು ಮಾಹಿತಿಗಳು ಹೊರಬೀಳುತ್ತಿವೆ…

ಈಗ ಎಲ್ಲರೂ ಅಂದುಕೊಂಡಿರುವುದು ಮಂಜು ವಾರಿಯರ್​ ದಿಲೀಪ್​ ಮೊದಲ ಪತ್ನಿ ಅಂತ… ಇದು ಬಹಿರಂಗವಾಗಿ ಜನರಿಗೆ ಗೊತ್ತಿರುವ ಸತ್ಯ… ಆದರೆ, ವಾಸ್ತವ ಇದಲ್ಲ. ಮಂಜು ವಾರಿಯರ್​ ದಿಲೀಪ್​ ಮೊದಲ ಪತ್ನಿ ಅಲ್ಲವೇ ಅಲ್ಲ…! ಪೊಲೀಸರಿಂದ ಸಿಕ್ಕ ಸುಳಿವನ್ನೇ ಇಟ್ಟುಕೊಂಡು ಕೇರಳದ ಪ್ರಮುಖ ಮಾಧ್ಯಮವೊಂದು ಸ್ಫೋಟಕ ವರದಿ ಪ್ರಕಟಿಸಿದೆ… ಅಂದರೆ, ಮಂಜು ಅವರನ್ನು ಮದುವೆಯಾಗುವ ಮುಂಚೆಯೇ ದಿಲೀಪ್​​​​​ ಬೇರೊಂದು ಮಹಿಳೆಗೆ ತಾಳಿ ಕಟ್ಟಿದ್ದರಂತೆ..!

ಅದು ದಿಲೀಪ್​ ಚಿತ್ರರಂಗಕ್ಕೆ ಬರುವ ಮುಂಚಿನ ದಿನಗಳು… ಅಂದರೆ ಸುಮಾರು 1990ರ ಕಾಲಘಟ್ಟ… ಈ ಸಂದರ್ಭದಲ್ಲಿ ದಿಲೀಪ್​ ತನ್ನ ದೂರದ ಸಂಬಂಧಿಯೊಬ್ಬರನ್ನು ವರಿಸಿದ್ದರು. ಅಲುವಾ ರಿಜಿಸ್ಟರ್​ ಆಫೀಸ್​ನಲ್ಲಿ ಇವರಿಬ್ಬರ ವಿವಾಹ ಮುಗಿದು ಹೋಗಿತ್ತು. ಇದಾದ ಬಳಿಕ ದಿಲೀಪ್​ ಚಿತ್ರರಂಗಕ್ಕೆ ಕಾಲಿಟ್ಟರು… ಇಲ್ಲಿ ದಿಲೀಪ್​ ಜೀವನದ ಗತಿಯೇ ಬದಲಾಗಿತ್ತು… ಈ ಸಂದರ್ಭದಲ್ಲಿ ದಿಲೀಪ್​ಗೆ ಹತ್ತಿರವಾಗಿದ್ದು ನಟಿ ಮಂಜು ವಾರಿಯರ್​​…

ಮಂಜು ವಾರಿಯರ್​ ಜೊತೆಗೆ ಶುರುವಾದ ಸ್ನೇಹ ಕ್ರಮೇಣ ಪ್ರೇಮಕ್ಕೆ ತಿರುಗಿತ್ತು… ಆದರೆ, ಈ ಸುದ್ದಿ ದಿಲೀಪ್​ ಪತ್ನಿಗೆ ತಲುಪಲು ತುಂಬಾ ಹೊತ್ತು ಬೇಕಾಗಿರಲಿಲ್ಲ. ಸಂಬಂಧಿಕರು ದಿಲೀಪ್​ ಪ್ರೇಮದಾಟವನ್ನು ಹೆಂಡತಿಗೆ ತಿಳಿಸಿದರು. ಇದರಿಂದ ದಂಪತಿ ನಡುವೆ ಸದಾ ಜಗಳ ನಡೆಯುತ್ತಿತ್ತು. ಕೊನೆಗೆ ಇಬ್ಬರೂ ದೂರವಾಗಿಯೇ ಹೋದರು. ಸದ್ಯ ಈ ಮಹಿಳೆ ಅರಬ್ ರಾಷ್ಟ್ರದಲ್ಲಿ ಜೀವನ ನಡೆಸುತ್ತಿದ್ದಾರೆ ಎಂಬ ಮಾಹಿತಿ ಪೊಲೀಸರಿಗೆ ಸಿಕ್ಕಿದೆಯಂತೆ…

ಹೀಗೆ, ತಮ್ಮ ಬದುಕಿನಿಂದ ಮೊದಲ ಹೆಂಡತಿ ದೂರವಾದ ಬಳಿಕ ದಿಲೀಪ್​ ಮದುವೆಯಾಗಿದ್ದು ಮಂಜು ವಾರಿಯರ್​ರನ್ನು…! 1998ರ ಅಕ್ಟೋಬರ್​​​​ 20ರಂದು ಇವರಿಬ್ಬರ ವಿವಾಹ ನಡೆದಿತ್ತು.. ಸಿನಿರಂಗದಲ್ಲಿ ಬ್ಯುಸಿ ಇದ್ದಾಗಲೇ ವೈವಾಹಿಕ ಜೀವನಕ್ಕೆ ಕಾಲಿಟ್ಟ ಮಂಜು ಬಳಿಕ ಬಣ್ಣದ ಲೋಕದಿಂದ ದೂರವೇ ಉಳಿದರು. ಇದು ಮಂಜು ಅಭಿಮಾನಿಗಳಿಗೆ ತುಂಬಾ ನಿರಾಸೆ ತಂದಿತ್ತು…

ಆರಂಭದಲ್ಲಿ ಇವರ ಮದುವೆಗೆ ಎರಡೂ ಕುಟುಂಬದ ವಿರೋಧ ಇದ್ದರೂ ಬಳಿಕ ಈ ವೈಮನಸ್ಸುಗಳು ದೂರವಾಗಿ ಅಲುವಾದಲ್ಲೇ ಕುಟುಂಬದೊಂದಿಗೆ ಇವರಿಬ್ಬರು ವಾಸ ಮಾಡಲು ಶುರು ಮಾಡಿದ್ದರು… ಕಾಲ ಹೀಗೆಯೇ ಸಾಗುತ್ತಿತ್ತು… ಮದುವೆ ಬಳಿಕ ದಿಲೀಪ್​ ಕೆರಿಯರ್​ನ ಗ್ರಾಫ್​ ಕೂಡಾ ಬದಲಾಗುತ್ತಾ ಹೋಯಿತು… ಹಲವು ಸೂಪರ್ ಹಿಟ್​ಗಳನ್ನು ಕೊಟ್ಟ ದಿಲೀಪ್​ ಮಾಲಿವುಡ್​ನಲ್ಲಿ ಸ್ಟಾರ್ ಆಗಿ ಮೆರೆಯಲು ಆರಂಭಿಸಿದರು.

ಆದರೆ, ಗುರುವಾಯೂರಿನ ಶ್ರೀಕೃಷ್ಣ ದೇವಾಲಯದಲ್ಲಿ ಮಂಜು ವಾರಿಯರ್​ ಅವರ ಅರಂಗೇಟ್ರಂ ವೇಳೆ ಪರಿಸ್ಥಿತಿ ತೀರಾ ಬದಲಾಗಿತ್ತು. ಆರಂಭದಲ್ಲಿ ಮಂಜು ಅರಂಗೇಟ್ರಂ ಅನ್ನು ಸ್ವತಃ ದಿಲೀಪ್ ಅವರೇ ಘೋಷಿಸಿದ್ದರೂ ಈ ಕಾರ್ಯಕ್ರಮಕ್ಕೆ ಗೈರಾಗಿದ್ದರು. ಇದು ದಂಪತಿ ನಡುವೆ ವೈಮನಸ್ಸು ಶುರುವಾಗಿದೆ ಎಂಬ ವಾದದ ಹುಟ್ಟಿಗೆ ಕಾರಣವಾಯ್ತು.. ಬಳಿಕ ಇದು ನಿಜ ಕೂಡಾ ಆಗಿತ್ತು… ದಂಪತಿ ಅದಾಗಲೇ ಮನಸ್ಸು ಮುರಿದು ಕೊಂಡಿದ್ದರು… ಅದಕ್ಕೆ ಕಾರಣ ಮತ್ತೋರ್ವ ನಟಿ ಕಾವ್ಯಾ ಮಾಧವನ್​​​…

ಮದುವೆಯಾಗಿ ವಿಚ್ಚೇಧನ ಪಡೆದಿದ್ದ ನಟಿ ಕಾವ್ಯಾ ಮಾಧವನ್​ ಮತ್ತು ದಿಲೀಪ್​ ನಡುವೆ ಪ್ರೇಮಾಂಕುರವಾಗಿತ್ತು ಎಂಬ ಸುದ್ದಿ ಆ ಟೈಮ್​ನಲ್ಲಿ ದೊಡ್ಡದಾಗಿಯೇ ಹಬ್ಬಿತ್ತು. ಇವೆಲ್ಲದರಿಂದ ಮನನೊಂದ ಮಂಜು ದಿಲೀಪ್ ಮನೆ ತ್ಯಜಿಸಿ ತ್ರಿಶೂರ್​ನಲ್ಲಿದ್ದ ತಮ್ಮ ಹೆತ್ತವರ ಮನೆಯಲ್ಲಿ ಹೋಗಿ ವಾಸ ಮಾಡಲು ಶುರು ಮಾಡಿದ್ದರು. ಮಗಳು ಮೀನಾಕ್ಷಿಯೊಂದಿಗೆ ದಿಲೀಪ್​ ಅಲುವಾದಲ್ಲೇ ನೆಲೆಸಿದ್ದರು. ಇದಾದ ಬಳಿಕ 2014ರಲ್ಲಿ ಮಂಜು ಮತ್ತೆ ಬಣ್ಣದ ಲೋಕಕ್ಕೆ ಮರಳಿದರು… 2015ರ ಜನವರಿಯಲ್ಲಿ ದಿಲೀಪ್ ಮತ್ತು ಮಂಜು ಅಧಿಕೃತವಾಗಿಯೇ ವಿಚ್ಛೇದನ ಪಡೆದು ದೂರವಾದರು… ಅದಾಗಲೇ ಕಾವ್ಯಾ ಮತ್ತು ದಿಲೀಪ್ ಹೆಸರು ಗಾಸಿಪ್​ ಕಾಲಂನಲ್ಲಿ ದೊಡ್ಡ ಮಟ್ಟದಲ್ಲಿ ಕೇಳಿ ಬರುತ್ತಿದ್ದರಿಂದ ದಿಲೀಪ್​ ಕೂಡಾ ಹಾಗೆಯೇ ಬದುಕಲು ನಿರ್ಧರಿಸಿದ್ದರು. ಕಾವ್ಯಾ ಮತ್ತು ದಿಲೀಪ್​ ನವೆಂಬರ್​ 25, 2016ರಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಡುವ ಮೂಲಕ ಇದುವರೆಗೆ ಹರಡಿದ್ದ ಗಾಸಿಪ್​ಗಳನ್ನು ನಿಜ ಮಾಡಿದರು… ಕೊಚ್ಚಿಯಲ್ಲಿ ಇವರಿಬ್ಬರ ವಿವಾಹ ಸಮಾರಂಭ ನಡೆಯಿತು.
ಬಹುಭಾಷಾ ನಟಿಯ ದೌರ್ಜನ್ಯಕ್ಕೆ ರೂಪಿಸಿದ ಕೇಸ್​ನಲ್ಲಿ ಸದ್ಯ ದಿಲೀಪ್​ ಜೈಲೂಟ ಉಣ್ಣುತ್ತಿದ್ದಾರೆ. ಅಸಲಿಗೆ ತಮ್ಮ ಮತ್ತು ಕ್ಯಾವ್ಯಾ ಮಾಧವನ್​ ಪ್ರೇಮದ ವಿಚಾರವನ್ನು ಆಗಿನ ಪತ್ನಿ ಮಂಜು ವಾರಿಯರ್​ಗೆ ತಿಳಿಸುತ್ತಿದ್ದರು ಎಂಬ ಸೇಡಿನ ಕಾರಣಕ್ಕೇ ದಿಲೀಪ್​ ಈ ಷಡ್ಯಂತ್ರ ರೂಪಿಸಿದ್ದರು ಎಂದು ಹೇಳಲಾಗುತ್ತಿದೆ… ಅದರಂತೆ ಇದೇ ವರ್ಷದ ಫ್ರೆಬ್ರವರಿ 17 ರಂದು ಶೂಟಿಂಗ್ ಮುಗಿಸಿ ಬರುತ್ತಿದ್ದ ನಟಿಯನ್ನು ತನ್ನ ಸಹಚರ ಪಲ್ಸರ್ ಸುನಿ ಮೂಲಕ ಕಾರಿನಲ್ಲಿ ಅಪಹರಿಸಿ ಲೈಂಗಿಕ ದೌರ್ಜನ್ಯ ನೀಡುವಂತೆ ಮಾಡಿದ್ದರಂತೆ ದಿಲೀಪ್​… ಈ ಪ್ರಕರಣ ಈಗ ದಿಲೀಪ್​ಗೆ ಬಹುದೊಡ್ಡ ಕುಣಿಕೆಯಾಗಿ ಬಿಗಿಯುತ್ತಿದೆ…

About sudina

Check Also

ಟೆರರಿಸ್ಟ್ ಅಂತ ಸುನಿಲ್ ಶೆಟ್ಟಿ ಅವರನ್ನು ವಿಚಾರಣೆ ನಡೆಸಿದ್ದ ಅಮೇರಿಕಾ ಪೊಲೀಸ್…!

ಯಾರಿಗಾದರೂ ಅಮೇರಿಕಾ ಪ್ರವಾಸ ಮಾಡೋದು ಅಂದರೆ ಅದೊಂದು ಹೆಮ್ಮೆ… ಇದರಲ್ಲಿ ಬಾಲಿವುಡ್ ಕಲಾವಿದರೂ ಹೊರತಾಗಿಲ್ಲ. ಆದ್ರೆ, ಹೀಗೆ ಅಮೇರಿಕಾಕ್ಕೆ ಹೋದಾಗ …

Leave a Reply

Your email address will not be published. Required fields are marked *

error: Content is protected !!